हिरानंदानीत सुरक्षा रक्षक दिशाहिन बंदुकीच्या गोळीचा शिकार

छायाचित्र: My Powai

घाटकोपर पोलीस प्रशिक्षण केंद्रातून दिशाहिन झालेल्या बंदुकीच्या गोळीने मंगळवारी हिरानंदानी येथील टोरिनो इमारतीत सुरक्षा रक्षक म्हणून काम करणाऱ्या प्रकाश दास (२८) यास आपले टार्गेट बनवले. सुरक्षा रक्षकाच्या मानेत घुसलेली गोळी पवई हॉस्पिटलमध्ये शस्त्रक्रिया करून काढण्यात आली असून, तो आता पूर्णपणे बरा असल्याचे डॉक्टरांनी सांगितले. याबाबत पवई पोलिसांनी गोळी चाचणीसाठी पाठवून अज्ञात व्यक्ती विरोधात गुन्हा दाखल केला आहे.

घाटकोपर पोलीस प्रशिक्षण केंद्रातून येणाऱ्या बंदुकीच्या दिशाहीन गोळीचे हिरानंदानी भागात येणे काही नवीन नाही. १९८० च्या उत्तरार्धात घाटकोपर भटवाडी येथे बनवण्यात आलेल्या पोलीस प्रशिक्षण केंद्रातून दिशाहीन झालेल्या बंदुकीच्या गोळ्या सतत हिरानंदानी, आयआयटी, आदिशंकराचार्य मार्ग येथे येत असतात. या दिशाहीन गोळ्यांनी कधी कार, कधी इमारतीची भिंत, कधी खिडकीची काच तर कधी घरांच्या पत्र्यांना नेहमीच आपले शिकार बनवले आहे. २००६ आणि २००८ च्या घटना वगळता अनेक घटनेत स्थानिक थोडक्यात बचावलेले आहेत. मात्र मंगळवारी दिशाहीन झालेल्या गोळीने हिरानंदानी येथील टोरिनो इमारतीमध्ये सुरक्षा रक्षक म्हणून काम करणाऱ्या प्रकाश दासला आपले शिकार बनवले.

“काही दिवसांपूर्वीच टोरिनो इमारतीत रुजू झालेला प्रकाश हा मंगळवारी सकाळी १० वाजण्याच्या दरम्यान मुख्य प्रवेश द्वाराजवळील चौकीत नोंदी करत बसलेला होता. अचानक काहीतरी टणक गोष्ट येऊन त्याच्या गळ्याला उजव्या बाजूला लागल्याचे त्याला जाणवले. आघातामुळे त्याचा आवाज निघणे बंद झाले आणि मोठ्या प्रमाणात रक्तस्त्राव होताना पाहून त्याला त्वरित पवई हॉस्पिटलमध्ये दाखल करण्यात आले. जेथे शस्त्रक्रिया करून ती टणक वस्तू काढली असता, ती बंदुकीची गोळी असल्याचे समजले” असे आवर्तन पवईशी बोलताना त्याच्या सहकाऱ्यांनी सांगितले.

“माहिती मिळताच जखमीला भेटून आणि घटनास्थळी जावून आम्ही घटनेची माहिती घेतली आहे. जखमीच्या मानेतून काढलेली गोळी आम्ही तपासण्यासाठी पाठवली असून, जखमीने कोणतीही तक्रार दिली नसल्याने, आम्ही वरिष्ठांना माहिती पुरवून अज्ञात व्यक्ती विरोधात गुन्हा दाखल करण्याची तयारी केली आहे.”असे आवर्तन पवईशी बोलताना तपासी अधिकारी महिला पोलीस उपनिरीक्षक जाधव यांनी सांगितले.

वारंवार घडणाऱ्या अशा घटनांनी स्थानिक मात्र पुरते धास्तावले असून त्यांच्याकडून हे प्रशिक्षण केंद्र लवकरात लवकर बंद करण्याची मागणी केली जात आहे. प्रशासन मात्र विकासक हा विकास करण्याच्या हव्यासेत या प्रशिक्षण केंद्राच्या जवळ पोहचल्याने अशा घटना घडत असल्याचे बोलत आहे.

पवई पोलीस ठाण्याच्या वरिष्ठ अधिकाऱ्याने याबाबत सांगितले, “गोळीच्या तपास अहवालानंतरच सर्व काही स्पष्ट होऊ शकेल. ती गोळी सरकारी बंदुकीतून कि खाजगी बंदुकीतून निघालेली आहे तेव्हाच स्पष्ट होईल; परंतु प्रथम दर्शनी ही गोळी घाटकोपर प्रशिक्षण केंद्रातूनच आली असल्याची शक्यता नाकारता येत नाही. त्या दिवशी तिथे सकाळी प्रशिक्षण चालू असल्याचीही खातरजमा आम्ही करून घेतलेली आहे.”

हिरानंदानी किंवा पवई भागात गोळी येण्याचा आणि लोकांना आपले निशाणा बनवण्याचा हा पहिला प्रकार नाही आहे. गेल्या दहा वर्षात घडलेल्या काही घटना खालील प्रमाणे: