सायबर गुन्हेगारांनी आता आपला मोर्चा ज्येष्ठ नागरिकांकडे वळवला असून, पवईतील एका ७२ वर्षीय व्यावसायिकाला ‘गॅस कापला जाईल‘ अशी भीती दाखवून तब्बल ८.८७ लाख रुपयांना लुटल्याची धक्कादायक घटना उघडकीस आली आहे.
नेमकं काय घडलं? एका सामान्य दिवसाची सुरुवात या व्यावसायिकासाठी भयानक ठरली. त्यांना ‘महानगर गॅस’चे बिल थकीत असल्याचा आणि त्वरित पैसे न भरल्यास कनेक्शन कापले जाईल, असा एक धमकीवजा संदेश आला. घाबरलेल्या व्यावसायिकाने संदेशातील नंबरवर संपर्क साधला. पलीकडून बोलणाऱ्या भामट्याने अत्यंत विश्वासू आवाजात त्यांना पेमेंट करण्यासाठी एक ‘फाईल’ (App) डाऊनलोड करायला लावली.
क्षणार्धात होत्याचं नव्हतं झालं. ती फाईल डाऊनलोड करताच तांत्रिक बिघाड झाल्याचे भासवत व्यवहार अयशस्वी दाखवण्यात आला. मात्र, काही वेळातच त्यांच्या मोबाईलवर बँकांचे संदेश धडकू लागले. त्यांच्या तीन वेगवेगळ्या बँक खात्यांमधून तब्बल ८.८७ लाख रुपये लंपास करण्यात आले होते. स्वतःच्या डोळ्यादेखत आयुष्यभराची पुंजी चोरीला जाताना पाहून त्यांना धक्काच बसला.
याप्रकरणी पवई पोलिसांनी फसवणुकीचा गुन्हा नोंदवला असून तपास सुरू केला आहे. ‘अनोळखी लिंक किंवा फाईल्स डाऊनलोड करू नका’, असे आवाहन पोलिसांनी केले आहे.
No comments yet.