पवईतील हिरानंदानी येथील प्रमुख रस्त्यावरील गर्दी कमी करण्यासाठी सम- विषम पार्किंग व्यवस्था

पवईतील वाहतुक कोंडी कमी करण्यासाठी आणि वाहनचालकांना दिलासा देण्यासाठी, मुंबई वाहतूक पोलिसांनी साकीनाका वाहतूक विभागाअंतर्गत पवईतील हिरानंदानी येथील एका प्रमुख रस्त्यावर तात्पुरती सम- विषम पार्किंग व्यवस्था सुरू केली आहे.

पूर्व उपनगरातील पोलिस उपायुक्त (वाहतूक) यांनी जारी केलेल्या अधिकृत आदेशानुसार, सेंट्रल अव्हेन्यू रोडवरील पवई प्लाझा बस स्टॉपपासून ऑलिंपिया जंक्शनपर्यंत आणि डी-मार्ट सर्कलपासून ईडन गार्डन प्रवेशद्वारापर्यंत हे नियमन लागू होईल. हा आदेश १३ फेब्रुवारीपासून लागू झाला आहे आणि १४ मे २०२६ पर्यंत लागू राहील.

वाहतूक अधिकाऱ्यांनी सांगितले की, परिसरात रस्त्यावरील मोठ्या प्रमाणात पार्किंग होत असल्याच्या वारंवार तक्रारी आल्यानंतर हा निर्णय घेण्यात आला आहे, ज्यामुळे मोठी गर्दी होत होती आणि आपत्कालीन वाहनांच्या वाहतुकीला अडथळा येत होता. हिरानंदानी गार्डन्समधील बँका, व्यावसायिक प्रतिष्ठाने आणि निवासी संकुलांमुळे गर्दी जास्त असते. त्यातच वाहने रस्त्यावर दुतर्फा उभी केल्याने अधिकच वाहतूक कोंडी होते.

नवीन व्यवस्थेनुसार, तारखेनुसार, रस्त्याच्या फक्त एकाच बाजूला वाहने पार्क करण्याची परवानगी असेल. सम क्रमांकाच्या तारखांना, रस्त्याच्या डाव्या बाजूला पार्किंग करण्याची परवानगी असेल, तर विषम क्रमांकाच्या तारखांना, वाहने उजव्या बाजूला पार्क करता येतील. या आदेशात प्रभावित भागात जड वाहने पार्क करण्यासही मनाई आहे.

या उपाययोजना तात्पुरते वाहतूक व्यवस्थापन उपाय म्हणून केले आहे. या प्रणालीमुळे गर्दी कमी होईल आणि गर्दीच्या व्यावसायिक आणि निवासी क्षेत्रात मर्यादित, नियंत्रित पार्किंगला परवानगी मिळेल अशी अपेक्षा आहे असे अधिकाऱ्यांनी सांगितले.

ट्राफिक पोलिस चाचणी कालावधीनंतर व्यवस्थेचा आढावा घेण्याची आणि वाहतुकीची परिस्थिती आणि जनतेच्या प्रतिसादावर आधारित पुढील पावले उचलण्याची शक्यता आहे.