पवई-चांदिवलीतील उद्याने होणार ‘ड्रग फ्री’; मंत्री शंभुराज देसाईंचे ‘मिशन मोड’वर कारवाईचे आदेश

पवई आणि चांदिवली परिसरातील रहिवाशांसाठी एक अत्यंत दिलासादायक बातमी आहे. गेल्या काही काळापासून हिरानंदानी पवई, चांदिवली आणि रहेजा विहार परिसरातील उद्यानांमध्ये वाढलेला अंमली पदार्थांचा विळखा आणि टवाळखोरी मोडीत काढण्यासाठी आता शासन स्तरावर कडक पावले उचलली गेली आहेत.

सह्याद्री अतिथीगृह येथे राज्य उत्पादन शुल्क मंत्री मा. ना. शंभुराज देसाई यांच्या अध्यक्षतेखाली आणि स्थानिक आमदार दिलीप (मामा) लांडे यांच्या विशेष पुढाकाराने एक महत्त्वपूर्ण बैठक पार पडली. या बैठकीत उद्यानांच्या सुरक्षिततेचा प्रश्न ऐरणीवर धरत, गुन्हेगारी प्रवृत्तींना आळा घालण्यासाठी प्रशासनाला ‘मिशन मोड’मध्ये काम करण्याचे कडक निर्देश देण्यात आले आहेत.

नेमकी काय होणार कारवाई?

उद्याने ही नागरिकांच्या विरंगुळ्यासाठी असतात, मात्र तिथे चालणाऱ्या अवैध प्रकारांमुळे स्थानिक रहिवाशांमध्ये भीतीचे वातावरण होते. ही बाब गांभीर्याने घेत बैठकीत खालील महत्त्वाचे निर्णय घेण्यात आले:

• विशेष पोलीस मोहीम: अंमली पदार्थ विक्री आणि सेवन करणाऱ्यांविरुद्ध पोलीस यंत्रणेमार्फत विशेष शोध मोहीम राबवली जाणार आहे.
• सुरक्षा रक्षकांची नियुक्ती: संवेदनशील मानल्या जाणाऱ्या प्रत्येक उद्यानात तातडीने चोवीस तास सुरक्षा रक्षक तैनात केले जातील.
• सीसीटीव्ही आणि प्रकाश व्यवस्था: उद्यानांची सुरक्षा अधिक सक्षम करण्यासाठी आधुनिक तंत्रज्ञानाचा वापर करण्यावर भर दिला जाईल.
• कठोर देखरेख: रात्रीच्या वेळी उद्यानांच्या परिसरात होणाऱ्या संशयास्पद हालचालींवर परिमंडळ १० च्या पोलिसांची करडी नजर असेल.

प्रशासकीय आणि स्थानिक नेत्यांची उपस्थिती

या बैठकीला पोलीस उपायुक्त (परिमंडळ १०) दत्ता नलावडे उपस्थित होते. आमदार दिलीप लांडे यांनी परिसरातील समस्यांचा प्रश्न मांडला. तसेच शाखाप्रमुख शिवाजी सूर्यवंशी, हिरानंदानी रहिवाशी संघटनेचे संजय तिवारी, विधानसभा प्रमुख अशोक माटेकर, समाजसेवक रवींद्र म्हस्के, प्रयाग लांडे, महादेवनजी आणि निसर्ग संस्थेचे दत्तात्रय कुंभार यांनीही या चर्चेत सहभाग नोंदवून नागरिकांच्या सुरक्षिततेसाठी आग्रही मागणी केली.

आमदार दिलीप लांडे यांच्या पाठपुराव्यामुळे आता पवई-चांदिवलीचा परिसर सुरक्षित आणि व्यसनमुक्त होण्याच्या दिशेने एक मोठे पाऊल पडले आहे. प्रशासनाच्या या आक्रमक पवित्र्यामुळे आता उद्याने पुन्हा एकदा लहान मुले आणि ज्येष्ठ नागरिकांसाठी निर्भय आणि आनंददायी ठरतील, अशी आशा व्यक्त केली जात आहे.