रस्त्याचा काही तयार भाग
चांदिवली आणि हिरानंदानी (पवई) या दोन गजबजलेल्या आणि वेगाने विकसित होणाऱ्या परिसरांना जोडणारा अत्यंत महत्त्वाकांक्षी ६० फुटी चांदिवली-हिरानंदानी जोडरस्ता गेल्या पाच वर्षांपासून लालफितीत आणि प्रशासकीय अनास्थेत पुरता अडकला आहे. खैरानी रोड, डी-मार्ट, विसिनिया संकुल, संघर्षनगर जामा मशीद आणि पवार पब्लिक स्कूल मार्गे हिरानंदानीला जोडणाऱ्या या प्रस्तावित मार्गाचे काम २०२१ मध्ये सुरू होऊनही आजतागायत रखडलेलेच आहे. जे पाहता “लाखो प्रवाशांच्या दळणवळणाचा प्रश्न सुटणार कधी आणि रस्ता पूर्ण होणार कधी?” असा जळजळणारा प्रश्न आता नागरिक विचारत आहेत.
वाहतूक कोंडीचा अभूतपूर्व वेढा आणि नागरिकांचे हाल
पवई- चांदिवली परिसरात नव्या प्रकल्पांचे पीक आले असून, लोकसंख्येत प्रचंड वाढ झाली आहे. सध्या चांदिवलीतून हिरानंदानीकडे जाण्यासाठी पंचसृष्टी संकुल किंवा रामबागवरून जेव्हीएलआर मार्गे प्रवास हेच पर्याय उपलब्ध आहेत.
- दीर्घ फेरा: रामबागवरून जेव्हीएलआरमार्गे जाणे अत्यंत लांबचे आणि वेळखाऊ ठरते.
- पंचसृष्टीवर ताण: परिणामी, बहुतांश वाहतूक पंचसृष्टी मार्गावरूनच वळवली जात असल्याने या चिंचोळ्या रस्त्यावर वाहनांच्या लांबच लांब रांगा लागतात.
- शालेय विद्यार्थ्यांची कुचंबणा: विशेषतः शाळेच्या वेळेत तासनतास वाहतूक कोंडी होते. रुग्णवाहिका, शालेय बस आणि नोकरदार या चक्काजाममध्ये दररोज भरडले जात आहेत.
या नरकयातनेतून सुटका करण्यासाठी बृहन्मुंबई महानगरपालिकेच्या विकास आराखड्यात ६० फुटी पर्यायी रस्त्याची तरतूद करण्यात आली आहे. स्थानिक रहिवासी आणि लोकप्रतिनिधींच्या सातत्यपूर्ण पाठपुराव्यानंतर २०२१ मध्ये अखेर काम देखील सुरू झाले आहे, पण पुढे ‘चित्र जैसे थे’च राहिले.
काम नक्की कुठे आणि का अडकले?
फेब्रुवारी २०२१ ते ऑगस्ट २०२६ दरम्यान डी-मार्ट ते पॅलेशियल हाईट्स (विसिनिया चौक), विसिनिया संकुल, संघर्षनगर ते पवार पब्लिक स्कूल आणि हिरानंदानीच्या (SEZ) बाजूकडील मार्गाचे काँक्रिटीकरण पूर्ण झाले. परंतु, रस्त्याचा सर्वात महत्त्वाचा आणि कणा असलेला मध्यवर्ती भाग अजूनही जैसे थे स्थितीत आहे.
रखडपट्टीची प्रमुख कारणे:
- खाजगी जमिनींचा अडसर: सूत्रांनी दिलेल्या माहितीनुसार, या प्रस्तावित मार्गातील खाजगी जागामालकांनी आपल्या जमिनीतून रस्ता नेण्यास ना हरकत दिलेले नाही.
- अतिक्रमणे व प्रार्थनास्थळे: विसिनिया संकुल ते पवार पब्लिक स्कूल या दरम्यानच्या भागात काही चाळसदृश वस्त्या आणि प्रार्थनास्थळे रस्त्याच्या आखणीत येत आहेत. त्यांच्या पुनर्वसनाचा आणि स्थलांतराचा निर्णय घेण्यात पालिका प्रशासन पूर्णपणे अपयशी ठरले आहे.
विकासकांच्या फायद्यासाठी जाणीवपूर्वक दिरंगाई?
स्थानिक नागरिकांचा संताप आता अनावर झाला असून, प्रशासनाच्या हेतूवरच गंभीर प्रश्न उपस्थित केले जात आहेत.
“पालिका प्रशासन आणि लोकप्रतिनिधींनी जर प्रामाणिक इच्छाशक्ती दाखवली असती, तर अवघ्या दोन वर्षांत हा मार्ग पूर्ण होऊन जनतेच्या सेवेत दाखल झाला असता. मात्र, चांदिवली आणि हिरानंदानी भागातील बड्या विकासकांच्या आगामी आणि सुरू असलेल्या आलिशान प्रकल्पांचे आर्थिक हितसंबंध जपण्यासाठीच हा रस्ता जाणीवपूर्वक रखडवला जात आहे,” असा खळबळजनक आरोप आता स्थानिक रहिवाशांकडून केला जात आहे.
आश्वासनांची खैरात; प्रत्यक्ष भूमीवर मात्र शून्यता
या संपूर्ण प्रकरणावर स्थानिक लोकप्रतिनिधी आणि पालिका प्रशासनाची भूमिका संशयास्पद आणि ढिसाळ राहिल्याची टीका होत आहे. पालिकेच्या अधिकाऱ्यांनी “पावसाळ्यानंतर कामाला पूर्ण जोमाने सुरुवात करू” असे नेहमीचे गुळगुळीत उत्तर दिले आहे.
प्रश्न उरतो तो इतकाच: आश्वासनांचे हे खेळ आणि प्रशासकीय टोलवाटोलवी अजून किती वर्षे चालणार? चांदिवलीकरांची रोजची वाहतूक कोंडीतून मुक्ती कधी होणार, की हा रस्ता कायमचा कागदावरच आणि विकासकांच्या दावणीलाच बांधलेला राहणार?
No comments yet.